Balans

Die outomatiese deur swaai oop en 'n ander wêreld begroet jou wanneer jy deurstap.  'n Chlooragtige, klam reuk begroet jou saam met die vriendelike vrouens by die toonbank wat almal rooi uniforms dra.  Een van hulle neem jou kaart, "swipe" dit en jy word ingelaat.  Paartjies vriende of vriendinne loop rond met handdoekies oor die skouers, waterbottel in die hand en dalk iPod in die ore.  Dis die gimansium uur.  Partymaal kry ek nogal snaaks vir die mense-spesie.  Die treadmill-drawwers lyk soos hamsters wat nêrens kom nie.  Ek let die een doelgerigte meisie amper elke dag op, wat seker beteken dat ek net so toegewyd is soos sy.  Sjoe, sy kan daardie airwalker trap dat dit lyk asof sy dit wil laat omval en los vir dood.  Ek lag in my mou vir die ou wat sy hemp optrek en sy eie maagspiere bewonder.  Nou ja, hy verdien dit seker ook na 'n harde tyd se situps en crunches en wie weet wat nog als.  Oe, en dan is daar die eksie-perfeksie meisie wat die eerste keer toe ek haar gesien het pas-bymekaar-pienk-ALLES aangehad het.

Ja-nee, die gym is kompeterend op meer as net die fisiese lyf-vlak.  Die fisiese klere-vlak bly nie agter nie, om nie eens te praat van die fisiese toebehore-vlak nie.  Ek het nie ingeskryf vir een van hierdie fisiese kompetisies nie en kan nie help om te wonder of iemand my nie dalk jammer kry met my stokou universiteits- en stranddienste T-hemde, knielengte broeke en my freebee ATKV waterbottel nie.  Waarvoor ek my die meeste skaam, is natuurlik my stukkende tekkies.  Ai, ek het sulke side-kick kleintoontjies by my ma geërf en die goedjies het my ses maande-oue tekkies van binne af gevra vir asem en nou hardloop of spring of loop hulle baie gerieflik buite my tekkies rond.  Nee, kyk, ek het besluit die mense hier sal my net vir my persoonlikheid leer liefkry en beslis nie vir my voorkoms nie. 

Toemaar, moenie bekommerd wees oor boklammetjie se selfvertroue nie.  Sy het darem 'n gymmaat (haar nuutskepping) wat opmaak vir my tekortkominge.  Nou lyk dit darem immers asof ek sosiaal aanvaarbaar is, want iemand assosieer met my.  Sy ken selfs van die instrukteurs en weet hoe om die masjiene te gebruik.  So, deesdae is my gym-sessies ook meer gefokus en effektief. 

Vandag het ek nie weer die fout gemaak om vir die maagspiere-klas te gaan nie, maar ek het lekker naby gaan roei en gelag vir die arme bloedjies daar op die grond waar Mina die gym-instruktrise hulle vermorsel het.  Dis slim, want nou kan ek al die "moves" leer en dit by die huis na-aap op my eie tyd en in my eie hoeveelhede.  Moet sê dit help darem om te sien dat dit nie net ek is wat plat val wanneer Mina sê:  "And hold for eight more!" nie.  Nee, maggies, daardie vrou het geen genade nie(al sou jy dit nooit sê as jy na die ongeveer elfjarige dogtertjie wat die klas met so min moeite voltooi het nie).
Die ander deel van my oefenprogram is om soms te draf, maar my leefstyl en toegewydheid laat dit nie baie gebeur nie.  Hopelik kom ek more oggend voor werk vroeg genoeg uit die vere om weer so 'n heen-en-weertjie te gaan draf.

Jy sal dalk nou dink ek is een of ander oefen-freak of iemand wat net graag wil grootpraat, maar ek doen hierdie regtig net vir my eie "sanity".  Mens kan g'n so heeldag sit en rekenaar-kyk en lêers ronddra nie.  Daar kort balans in so 'n dag.  En so lui die spreekwoord ook:  'n Gesonde liggaam huisves 'n gesonde gees!