Afrikaans

In the words of the famous Tolla van der Merwe:  "Nee, wat, jy's mos'ie baas hie!"  Hierdie is my blog en ek is nie meer lus vir sukkel om Engelse woorde raak te hap nie.  Die taal kleur nie lekker in nie en die woorde ontgaan my.  So, ek maak nou vir Boklammetjie opreg plattelands-Afrikaans.  Geen klagtes?  Geen klagtes!  My tannie vertel my gereeld van die ou oom daar in die aftree-oord wat so woes baie kla.  Hy is nou sommer gerantsoeneer tot "net" vier klagtes per jaar.  Ek dink die oom gaan in die volgende vergadering oor hierdie einste beperking kla.  Siestog!  Maar moet jy nou asseblief nie kla oor my Afrikaanse revolusie nie, want jy weet jy het nie eintlik 'n probleem daarmee nie.

'n Mini-orkaan het ons ou arme huisie (daar naby die boklammers se kraal) getref en so wragtie waar 'n stuk van die dak afgeblaas.  Ander skade sluit ook stukkende sonpanele en 'n wind-skeef massiewe (ek skat hom so twee meter dik) peperboom!  Ma en broer vind hierdie uit op hul terugkoms van die ander plaas.  Die maere Jan-Pap wat dinge moes regsien op die plaas het glo vir tien minute lank vir sy lewe gevrees terwyl die wind kwaai rondgehardloop het buite sy huisie.  En binne daardie 10/15 minute het dit glo ook 25mm gereën.  My brawe broer sê hy is nie kwaad of moedeloos of hartseer nie.  Jy kan nie baklei teen die natuur nie.  Jy tel maar weer die sinkplate op, eis by die versekering en maak die boklammers verder groot.

Terwyl daardie kant van die familie met groot probleme sit, bekyk hierdie kant s'n vir die eerste keer die Blou Bulle vanuit Pretoria.  Ek is mos so bevoorreg dat ek DSTV toegang het by my tannie, so terwyl ek nou nie vriende het nie, groei ek maar blokkies-oë.  Het juis vandag ook so duimvasgehou dat Bangladesh vir Indië in die krieket wêreldbeker sal wen, maar nee, die manne in blou het met die louere weggestap.  Ek sien uit na Donderdag, die 24ste Februarie, wanneer die Proteas die Windies (Wes-Indië) pak.  Mag die Proteas blom!

Ja, vriende, familie,  kollegas en kennisse, mag dit met julle ook net voor die wind gaan en mag julle dae gevul wees met betekenisvolle gebeurtenisse.

Groete,
Die Afrikaanse blou-boklam