My binnekamer

Ek verneem van betroubare bronne dat hierdie spasie dopgehou word vir terugvoer oor die netheid van my kamer. Ek rapporteer trots terug dat ek toe wel Sondagaand niks ander gedoen het as kamer uitsorteer, wasgoed uitsorteer, gedagtes uitsorteer en so aan en so aan. Dit was beslis 'n goeie ding en soos my wyse suster sê: "Dis die fondasie vir 'n klomp ander dinge."

Dis dag 2 en die kamer is nog foutloos. Ek het iewers gehoor dat navorsing bewys het dat dit 28 keer se herhaling neem vir iets om 'n gewoonte te vorm. Dit beteken die 8ste Mei vir my! Dit behoort 'n groot en interessante uitdaging te wees, aangesien prioriteit dit soms noodsaak dat sekere dinge eerder gedoen word as kamer-netheid in stand hou.

Nog wysheid kom ook in die vorm van: "Ken jou grootste struikelblokke, identifiseer hulle en dink hoe jy dit kan minimaliseer." Dis natuurlik dinge soos moegheid, luiheid, min tyd, seer spiere, selfbejammering, ensovoorts. Die planne sal ek maar vanaand voor ek slaap beraam. Dis in elk geval 'n vrou se voorreg om nie al haar geheime uit te lap nie. Julle weet reeds dat netheid nie so 'n natuurlike ding vir my is nie.

Mense, die feit bly staan dat netheid goed is vir jou binneste ook. Dis een van daardie roetine-dinge wat mens liewer in jou lewe wil inbou. Dis soos links en regs kyk voor jy oor die straat stap, om asseblief en dankie te sê en vir ouer mense jou stoel aan te bied. Later is dit so deel van jou jy dink nie meer daaroor nie, maar dit bly goed vir jou!

En daar is nog 'n HELE paar goeie gewoontes wat ek nog in hierdie lewe wil inbou... Een ding op 'n slag!