Die ou tannies van die dorp het in hulle wysheid altyd gesê dat 'n deurmekaar kamer 'n deurmekaar binneste weerspieël...
Nou ja, ek wens ek kon bietjie met een van daardie tannies gesels vanaand, want hierdie binneste is skynbaar WOES deurmekaar. Die missie vir die aand is om daai ongelooflike boek wat ek lees te ignoreer soos 'n stopstraat (ek ignoreer nie stopstrate in die regte lewe nie - dis net spreekwoordelik) en hierdie kamer van my uit te sorteer. Prioriteite is egter deurmekaar, want hier sit ek nou eers en blog op een van die min oop spasies op my kamer se mat. Dis asof alles in hierdie kamer my irriteer! Aaaaahhhh!
Eerstens is daar hierdie massiewe dubbelbed wat die plek vol staan. Dit het (nie te erg lelike) bruin beddegoed op en my gunsteling kleure is almal baie mooier as dit - wit en iets soos groen of blou of pers sou al klaar die gevoel hierbinne beter gemaak het. Ek wil eintlik net 'n eenvoudige enkelbedjie hier hê - kan in elk geval nie eens met 'n teddiebeer slaap nie, so die spasie is oorbodig en maak net dat ek goed daarop uitstal. Dus, die bed moet gaan. Selfs dit het sy komplikasies. Dus, die bed bly en die bruin beddegoed ook, want om beddegoed te koop is nou nie 'n uitgawe wat ek kan of wil aangaan nie.
Dan is daar die twee bedkassies wat ook net baie plek vat en min kan stoor. Rakke, dis nou vir jou prakties! Helaas, hier is nie rakke nie en ek kry nêrens mooi kassies nie, so ek oorweeg om heel Nutsman te gaan en een te maak met hout en saag en veil en verf.
Daar is ook 'n gebrek aan 'n wasgoedmandjie, want dis nou weer iets wat net hopeloos te duur raak, soos dit begin mooi wees. Intussen gebruik ek nog my sub A wasgoedsak wat moeder vir my gemaak het. Daar is nou vir jou 'n kwaliteit wasgoedsak - 18 jaar later werk hy nogsteeds soos 'n bom.
Op daardie noot is ons besig om 'n wasgoeddraad te prakseer. Fase een is reeds afgehandel en dit behels die twee dwarsbalke, maar nog geen DRAAD nie. Wasgoedwas is nog 'n probleem en lei tot oorbenutting van handdoekreëlings en enige iets anders waaroor klere kan hang. My persoonlike gunsteling is die treadmill(wat 'n wit olifant is). Daar hang mens 'n paar hangers vol klere aan die handvatsel deel op.
Ek kan so aangaan en komies wees en maak asof dit die plek se skuld is, maar hierdie binnekamer is my eie verantwoordelikheid. Miskien moet ek myself bietjie krediet gee vir die feit dat ek aanpas in 'n nuwe omgewing, maar vanaand is die aand dat ek begin verskonings minimaliseer. Kyk hierdie spasie om uit te vind of die uitsorteer van die kamer my help om beter te voel oor my binneste...
Ek het betroubaar verneem dat die instelasie van die wasgoedlyn 'n streng tydskedule gevolg het. Dit klink vir my asof die tweede fase effens agter skedule is? Oorweeg dalk 'n ander kontrakteur....
ReplyDeleteJa, ek stem saam, Sandwolf. Bied jy aan? :)
ReplyDeleteJa, jy kan my maar kontak vir 'n kwotasie ;)
ReplyDelete